dimecres, 6 de juny de 2007

Perdre son temps


Per tu que me disias

qu'aparar la lenga d'oc

èra perdre son temps

Al degrà de vòstras mesuras

segur que perdem nòstre temps

dins de causas non racionalas , inutilas

non rendablas

Vos emmascam amb nòstras vielhas sansonhas

coma disetz

e pasmens la tecnica mai ufanosa es totjorn

tant despoderada davant nòstra pròpia mòrt ...

Que viure es benlèu perdre son temps

sentir l'aire dintrar a bodre

amb plaser dins sos palmons

niflar las odors de flors de garriga

a n'èstre desvariat

calinar una pèu aimada

a ne venir caluc

Que viure es perdre son temps

a s'engatjar per l'uman

pensar la beutat del mond

a l'auçada de la paritat

èstre e dire dins la libertat de la paraula

Es qu'es aquò perdre son temps ?

Que pensar es benlèu tanben perdre son temps

pensar dins una lenga causida

dins una lenga de la talvera

de la rasa e del valat

lenga de pagès e de cocha-vestits

Oc perde mon temps

e o dise fòrt

tant que me demòra

un pauc de vida en ieu

perdrai mon temps

fins al darrièr badal ...


Joan-Pau Creissac

4 de julhet de 2006